«Маңғыстаумұнайгаз» АҚ
«Маңғыстаумұнайгаз» акционерлік қоғамының Бас директоры Айдарбаев Алик Серікұлы өз командасымен бірге өндіріспен танысуды «Жетібаймұнайгаз» өндірістік басқармасынан бастап, кенорындарындағы өндірістік және әлеуметтік нысандарды аралады.
Олар Жетібай кенорнындағы № 1-ші, №2-ші мұнай өндіру, мұнайды дайындау және айдау цехтарында, УСГ-1, ГПЭС-1000 кВт модульді компрессор станцияларында, Жетібайдан алғашқы мұнай атқан № 6 ұңғының басына орнатылған ескерткіште,т.б. нысандарда болып, оларда еңбек етіп жатқан мұнайшылармен кездесіп, әңгімелесті.
Бас директор мұнайшыларға сервистік қызмет көрсететін компаниялардың да қызметтерімен танысты. Атап айтқанда «Ойлсервискомпани» ЖШС-ның, «Ойлтранспорткорпорейшэн» ЖШС-ның, «Техно-трейдинг» ЖШС-ның базалық нысандарында болды. № 2-ші мұнай-газ өндіру цехының аумағында № 2969 ұңғысын бұрғылап жатқан жаңа ZG40 бұрғылау станогінің (КНР), № 2096 ұңғысындағы жүргізіліп жатқан күрделі жөндеу жұмыстарымен танысты.
Сондай-ақ Бас директор Асар, Оңтүстік Жетібай, Бұрмаша кенорындарына да ат басын тіреді. Өндірістік басқармаға қарасты жұмысшы жатақханаларының, асханаларының бүгінгі таңдағы жай-күйі де назардан тыс қалған жоқ.
Жұмыс сапарының қортындысымен өткізілген кеңесте Алик Серікұлы басты назарды - барынша еңбек өнімділігін арттыруға, ол үшін қабылданған әрбір техникалық шаралардың орындалысын қатаң қадағалауға, сервистік қызмет көрсететін кәсіпорындармен бірлесіп жұмыс істеуге, ал ЖШС-лардың өздерінің техникалық жабдықталуын жақсарту керек екенін, түпкілікті мақсат экономикалық тұрғыдан алғанда біреу –ол мұнай өндіру жолдарын жақсарта отырып, қортындысында пайдаға шығуға аударып, өзге де міндеттерді саралады.
